3h • Daily Journal 📓
Day 1 Daily journal Thursday (1-1-26 )
Aaj naya saal shuru ho gaya, lekin sach bataoon toh subah bistar chorna aaj meri zindagi ka sab se mushkil kaam tha. Sardi itni thi ke bas dil kar raha tha blanket mein hi ghusa rahoon. Khair, himmat kar ke utha aur university ke liye jaldi nikal gaya.
University pohanch kar ehsas hua ke aaj ka din thora heavy hone wala hai. Teachers aaj full mood mein thay, lag raha tha saara syllabus aaj hi parha dena hai. Pehle OOP ki class mein 'Virtual Inheritance' ne thora dimagh ghumaya, aur phir Probability & Stats mein 'Regression' parha. Shukr hai beech mein COAL walay sir nahi aaye, toh thora saans lene ka mauqa mil gaya.
Lekin sach kahoon toh aaj university mein woh maza nahi tha kyunke mera best friend absent tha. Yaar, jab woh nahi hota toh waqt guzarna mushkil ho jata hai, lectures bhi double lagte hain. Jab main free hua toh akele hi mausam enjoy kiya. Sardi ki thandi hawa aur hath mein garam chai ka cup yeh aaj ka best moment tha. Ajeeb sa sukoon tha us waqt.
Ghar wapis aaya toh bhook se bura haal tha. Ammi ne anda paratha aur chai bana kar di, qasam se khaa kar rooh khush ho gayi. Phir Zuhr ki namaz parhi. Aaj sajde mein bas dil se aik hi dua nikli: "Ya Allah, Tu mere liye kaafi ho ja." Yeh soch kar hi dil ko bohut itminan mila ke Jab Woh saath hai toh kisi aur ki kya zaroorat.
Dophar mein thora rest kiya aur apne dost ko call ki taake uska haal chaal le sakun, uski tabiyat ka sun kar tasalli hui. Shaam mein thori tension ho gayi thi, assignment aur project submit karwana tha, print toh nikalwa liya tha lekin jaldi mein front page lagana bhool gaya! Aisi choti mistakes par kabhi kabhi khud pe gussa aata hai, lekin khair, manage ho gaya.
Raat ko main ne socha ke ab sirf university ki parhai kaafi nahi hai. Is liye Freelancing course ki pehli 3 videos dekheen aur proper notes banaye. Kuch naya seekh kar bohut acha feel hua, lag raha hai main right track par hoon.
Aaj sone se pehle dil Allah ka shukr ada kar raha hai. Dunya mein kitne log hain jo bhookay sotay hain, aur Allah ne mujhe sab kuch diya hai, izzat ki roti aur pur-sukoon neend.
Kal ka Plan: Apna Business Idea competition mein pitch karna ha thori nervousness hai lekin excitement bhi. Project bhi submit karwana hai aur freelancing ki videos ke saath saath ab bidding seekhni shuru karni hai. InshaAllah, kal ka din behtareen hoga!
1
0 comments
Day 1 Daily journal Thursday (1-1-26 )
powered by
skool.com/make-1k-5k-in-30-days-8449
Media Valley School is the fastest way to hit $1K/month with freelancing or agency work. Guaranteed.
Land your first $1K month in 30 days
Suggested communities
Powered by