خلوني أشارككم شي من تجربتي، ويمكن يخلي بعضكم يعيد التفكير في الهدف من تعلم الذكاء الاصطناعي. أنا شخصياً لما بدأت أتعلم الذكاء الاصطناعي كان عندي ثلاث أهداف، أولها إني أحصل على فرصة وظيفية أفضل، وثاني شي إني أزيد دخلي، وثالث شي إني أقدر أشتغل مع شركات وأحصل على عملاء. والحمدلله اليوم أقدر أقول إني حققت الثلاثة. حصلت على فرصة أكون شريك في تطبيق تقني متخصص في المجال الرياضي ويستخدم الذكاء الاصطناعي، وبرضوا بدأت أقدم دورات تعليمية وصارت مصدر دخل إضافي لي، غير المشاريع الجانبية اللي اشتغلت عليها مع شركات وأفراد. لكن ليش أقولكم الكلام هذا؟ لأن الصراحة أشوف ناس كثير تدخل مجال الذكاء الاصطناعي وتبدأ تتعلم كل أداة جديدة تطلع، وكل يوم دورة جديدة، لكن لو سألته أنت ليش تتعلم؟ ما عنده إجابة واضحة. ومو شرط يكون هدفك نفس هدفي، يمكن أنت موظف وتبغى ترقية، أو عندك مشروع وتبغى تطوره، أو حتى تبغى توفر وقتك في شغلك اليومي. اللي أبغى أوصله إنك قبل تبدأ تتعلم، اسأل نفسك إيش أبغى أحقق من الذكاء الاصطناعي؟ لأن مو معقول تقضي شهور تتعلم أدوات وتتابع أخبار وتجمع دورات وبالنهاية ما تعرف كيف تستفيد من كل اللي تعلمته. 👀 والحين عندي فضول أعرف منكم شي إيش هدفك أنت من تعلم الذكاء الاصطناعي؟ هل هو وظيفة، دخل إضافي، مشروع خاص، أو شي ثاني؟ وإذا بدأت تتعلم من فترة، هل وصلت للهدف اللي كنت تبغاه؟ شاركوني، ودي أشوف تجاربكم ❤️

عارف اني اشغلتكم لأن الصراحة ودي أشوفكم كلكم معي في tidri.app، وجودكم مكسب لي وأتشرف فيكم جميعًا. بس خلوني أتكلم معكم شوي عن رحلة بناء منصة «تدري» التعليمية. الفكرة بدأت بعد ما ابتعدت فترة عن المجال التعليمي بسبب انشغالي في العمل مع العملاء والشركات. وخلال هالفترة اكتشفت شي، إني أتحمس لتقديم المعلومة وتعليم الناس أكثر من حماسي لبناء المشاريع للشركات. لا تفهموني غلط، الشغل مع الشركات فيه خير ولله الحمد، وعشان كذا كان القرار صعب علي، إني أوقف استقبال المشاريع وأرجع أركز على تسجيل الدورات وتعليم الناس. لكن الصراحة ما فيه شعور يقارن لما تشوف شخص تعلم منك شي واستفاد منه، سواء حصل على وظيفة، أو طور من نفسه، أو حتى بدأ مشروعه الخاص. وهذا الشي اللي كنت مشتاق له. بس كانت عندي مشكلة وحدة، وهي الوقت. لأن تسجيل الدورات وتجهيزها والتسويق لها ومتابعة الطلاب والدعم الفني والأمور الإدارية كلها تاخذ وقت وجهد كبير. فقلت لنفسي، ليش ما أبني منصة تشيل عني 50٪ من هالشغل؟ ومن هنا بدأت أخطط لمنصة «تدري». الفكرة مو مجرد منصة أحط فيها دوراتي وخلاص، لا، أبغى أبني منصة يكون فيها الذكاء الاصطناعي مسؤول عن جزء كبير من الشغل الإداري، من تجهيز الدورات وتنظيمها إلى الدعم الفني ومساعدة الطلاب. وبكذا أقدر أتفرغ للشي اللي أحبه فعلًا، وهو تقديم محتوى يستاهل وقتكم، والأهم من كذا متابعة الطلاب ومساعدتهم يوصلون لأهدافهم. لأن بالنسبة لي نجاح الدورة مو بعدد اللي اشتركو فيها، نجاحها الحقيقي بعدد الناس اللي استفادوا منها وطبقوا اللي تعلموه. وطموحي في «تدري» كبير جدًا، وأوعدكم بإذن الله إني ببذل كل اللي أقدر عليه عشان تكون من أفضل المنصات التعليمية في السوق السعودي. وأعرف إن الكلام سهل، لكن بإذن الله تشوفون هالشي على أرض الواقع. وحبيت أشارككم هالكلام لأن كثير منكم كانوا معي من بداية المجتمع، وما ودي يكون الانتقال إلى «تدري» مجرد رابط أرسله لكم وأقول سجلوا فيه. ودي تعرفون ليش قررت أبنيها، وإيش أبغى أوصل له من خلالها. وبإذن الله القادم أجمل لنا جميعًا ❤️ حبيت أفضفض معكم شوي، وشكرًا لكل شخص كان وما زال جزء من هالرحلة.