في اللايف بتاعي امبارح (سواء حضرته او لا)، كنت بتكلم عن طريقه ازاي تلاقي بيها منتج يساعدك تعمل مبيعات كويسه، واتكلمت ازاي بعمل ده ف البراند بتاعي كل موسم. اللايف بتاعنا يوم الاتنين الساعه ٩ هكون بتكلم معاكم بالتفاصيل في ده، هوريلكم الادوات الي بستخدمها عشان اجيب المنتجات الي عليها طلب عالي، وهوريلكم ازاي تنسقوا ده مع افكار المحتوي الي هتعملوه. بحيث يكون عندكم خطه كامله وبسيطه وانتوا شغالين وهتسهل عليكم كتير اوي. هتعرفوا انكم مش شرط تعملوا (هدوم)، لا انتوا كمان تقدروا تعملوا افكار كويسه ومختلفه لموسم الشتاء بالقماش، وبميزانيات قليليه. كله يعمل منبه عنده بالميعاد ده، وهستناكم جميعاً ان شاء الله

مساء الخير انا جايه احذر واحكي تجربتي مع الفوتوجرافر دا محمد بهاء والي معظم زمايلنا رشحوه انا اتسببلي ف ٥٠ الف جنيه خساير ف الشوت بتاعتي ف الكولكشن الصيفي بسبب الكواليتي ال سلمهالي انا كنت مصوره بالموبايل الفيديوز كانت احسن مليون مره من الي هو صورها ليا انا هنزلكم الفيديوز ال صورها وانتو احكمو صورلي ٣ فيديو وصور الويب سايت ب ١٠ آلاف جنيه والشوت كلها كلفتني ٣٠ الف وبسبب الكواليتي السيئه جدا لغيت الشوت كلها ونزلت صورت واحده تانيه كلفتني ٢٠ الف بس طالعه احسن مليون مره م الشوت ال عملها ولما بعتلي الفيديوز وقولتله انها دارك قالي انا مش هقدر اعملك !! حاجه ودا اخري وماتكلمنيش تاني !!!وعملي بلوك ياريت سيجما يحذفه من قايمة الترشيحات لانه انسان غير امين

بما انى عايشه فى السعوديه عايزه ابيع فى السوق السعودى واصنع فى مصر ، حد يعرف تفاصيل للموضوع انا عندى شركه شحن وتوصيل فى السعوديه وهتشيل عنى كل حاجه لانهم قرايبي ، بس انا خايفه من السوق السعودى وعايزه تفاصيل لو حد يعرف الدنيا هنا ماشيه ازاى

مساء الفل عليكو امبارح نزلت اجيب عينات القماش تعالو اشاركم اليوم واللي يستفيد يدعيلي دعوة حلوة كده اول اليوم بدء بنزوله للتربيعه اللي في الغورية بدايتها عند منزل كوبري الازهر هتبقي علي ايديكو اليمين اولا منصحكوش بهناك دلوقتي محدش نزل حاجه حلوه نهائي واللي موجود هناك شويه قطيفه ساده ومشجر وشويه ديربي بس خفيف شويه واسعارهم من ٧٥ ل ١٤٠ وروحت رمضان سند اللي لقيت كتير بيرشحوه برضو منزلش غير نوع ميلتون اسفنجي بس الضهر قطن مش مخلوط وده بيخلي الميلتون اخف من اللي ضهره مخلوط جبت منه عينه المتر عنده ب ٢٠٠ والكيلو ٣٢٠ بس المكان صعب جدا ومعرفش هل اما ينزلو الشتوي هيبقي في حاجات كويسه ولا لأ بس انا حسيت جسر السويس افضل وخدت بعضي نزلت علي جسر السويس تشكيل كبير بدء ينزل القطيفه والديربي منه انواع قطيفه وقماشه داخله فيها صوف مضلعه وفي صوف مكتكت وجوخ انواع في مصري وفي مستورد واسعارهم من اول ١٠٥ المتر ل ٢١٠ انا جبت عينه من نوع ابو ١٨٥ والقطاعي للعينه بيزيد ٣٠ جنيه علي المتر ومش كله بيدي عينات روحت ادور علي الميلتون الاسفنجي علون عنده ٣٤٠ جنيه الكيلو وعنده نوع اول مره ينزل ب٤٣٥ الكيلو بس كثافته اكتر وضهره انعم ومجبتش منه روحت عند cotton cany علبتكس ده اللي جبت منه نوعين الاسفنجي العادي ضهره مخلوط بس محترم والضهر في وبره كده بتطلع قالي بتروح بعد مرتين غسيل عشان بس تفهمو العملاء وده ب ٣١٠ ولو عاوزه عينه بيديكي حسب اللون المفتوح وييزيد ٢٥٪؜ علي سعر الكيلو وجبت نوع تاني داخل في بوليستر بس عندهم معالج ضد انه يوبر ده عجبني اكتر من الاسفنجي كمان بس هو اخف بس شكله احلي لو هتعملو سوت او بنطلونات وايد ليج ب ٢٣٠ الكيلو اسمها hp وعند جميع انواع الجبردين والحلو فيه الموديلات الجاهزه عنده بتاخدي منها افكار واللي يعجبك ممكن يوزنهولك هتعرفو بياخد كاك كيلو بالتقريب كده وممكن تصورو عادي الموديلات وتنفزوها لو عجباكو وبعدين روحت جبت فرو مستورد للجواكت والفيستات وده موجود في محلات كتيره اللي عالشارع جنب علبتكس الصف ده كله فيه حاجات حلوة والمتر بتاعه من ١٨٥ ل ٥٠٠ حسب نوعه والعرض في لغايه عرض ٢٤٠ سم وبعد كده النور قطع في المنطقه كلها وكان فاضل تلت ساعه ويقفلو فمشيت وهنزل تاني باذن الله هنزلكو كروت المحلات وصور القماش واي سؤال تحت امركو

هو لازم وانا عندي التيكباك اعمل باترون بردو؟ انا عارفة الفرق بينهم بس ايه فكرة التيكباك بقى طالما هعمل باترون