مساء الخير ياجماعه حبيت أفيدكم بمصنع تريكو ، تعاملت معاهم وبصراحه تعاملهم حلو جداً والكواليتي عاليه جدا ما شاء الله العنوان : 4 شارع ابو بكر الصديق - الثلاجات - منطقة الحفريه - امبابه الجيزه اسم المصنع : TRENDY للتواصل : 01201964440 هشام

نزلت جسر السويس ودا القماش الي لقيتو هناك كل الحجات الشتوي نزلت تقريبا في فرو وجلد وشمواه وجينيز وجبردين وجوخ وفي محلات كامله بتبيع فرو واحسن محلين بيبيعو فرو هوا دملخي تكس في شارع 18 بيبيع فرو مكتكت وانواع فرو كتير وفي محل شركه الحلواني الاقمشه وشارع 18في محلات فرو كتير في الجلد احسن محل هوا ابو اليزيد عندو كل انواع الجلد وفي جلد وفرو ووش جلد وكويس جدا وفي علبيتكس للجينيز والجبردين وعموما في محلات كتير اوي علي الناصيه بتبيع جيني وجبردين بس بصراحه الجبردين بتاعهم معجبنيش ويحاول ادور علي مكان كويس ولما تروحو تشترو من التجار نصيحه قوليلهم انكو هتاخدو منهم بالجمله بس عايزين كام متر اعملو بيهم عينه في الاول ولو الخامه تمام هتيجيبو منهم اتواب عشان هناك مش بيبقو عايزين يدو قطاعي خالص وكل الصور هحطها

عايز اعرف رأيكم ايه؟ + عايز اعرف رأيكم لو عايز اعمل حاجة unisex لاني حاسو حلو بس aggressive علي ان بنت تلبسه عايز برده رأي البنات لو هتلبسه حاجة unisex حابين تبقي عامله ازاي؟ ملحوظة : ديه مش الالوان الس هننزل بيها ده مجرد التصميم فقط

🩷 ازيكم يا شباب ممكن مساعده في اختيار اللوجو بتاع البراند وهشارك برضو معاكم انا عملته ازاي بمساعده الذكاء الاصطناعي البراند بتاعي اسكارفات اسمه (هجرة )نسبة الي هجرة الرسول صلى الله عليه وسلم من مكه للمدينه والبراند ليه فكرة من ورا اسمه وهي التغير والبراند فويس هتكون إيجابية اكتر انا بتارجت البنات الموديست من سن 20 ل 35 سنه ال عندهم حلم وهدف ونفسهم يوصلوا ليه وبيحبواا يلبسوا استايلات شيك ومودرن كمان انا في الاول كنت عاملة لوجو علي كانفا بنفسي وبعد كدا انا عملت زي ما سيجما قال دخلت علي Behance عجبني اوي استايلات لوجو براند محجبات وخدت منه اسكرين شوت دخلت علي chat gpt وشرحت ليه فكرة البراند وكمان رفعت الاسكرين شوت وكتبلي prompt اخدته وروحت علي برنامج اسمه ideogram وحطيت ال prompt وطلعلي افكار روعه ويمكن عملي نفس الشكل ال كنت عاوزاه لان برضو رفعتله الاسكرين شوت وعملي زيها وبعد كدا دخلت علي كانفا عدلت اللون و شويه حاجات قولولي انهي عجبكم اكتر وبرضو اللون ال لايق علي البراند ؟

مساء الفل عليكو امبارح نزلت اجيب عينات القماش تعالو اشاركم اليوم واللي يستفيد يدعيلي دعوة حلوة كده اول اليوم بدء بنزوله للتربيعه اللي في الغورية بدايتها عند منزل كوبري الازهر هتبقي علي ايديكو اليمين اولا منصحكوش بهناك دلوقتي محدش نزل حاجه حلوه نهائي واللي موجود هناك شويه قطيفه ساده ومشجر وشويه ديربي بس خفيف شويه واسعارهم من ٧٥ ل ١٤٠ وروحت رمضان سند اللي لقيت كتير بيرشحوه برضو منزلش غير نوع ميلتون اسفنجي بس الضهر قطن مش مخلوط وده بيخلي الميلتون اخف من اللي ضهره مخلوط جبت منه عينه المتر عنده ب ٢٠٠ والكيلو ٣٢٠ بس المكان صعب جدا ومعرفش هل اما ينزلو الشتوي هيبقي في حاجات كويسه ولا لأ بس انا حسيت جسر السويس افضل وخدت بعضي نزلت علي جسر السويس تشكيل كبير بدء ينزل القطيفه والديربي منه انواع قطيفه وقماشه داخله فيها صوف مضلعه وفي صوف مكتكت وجوخ انواع في مصري وفي مستورد واسعارهم من اول ١٠٥ المتر ل ٢١٠ انا جبت عينه من نوع ابو ١٨٥ والقطاعي للعينه بيزيد ٣٠ جنيه علي المتر ومش كله بيدي عينات روحت ادور علي الميلتون الاسفنجي علون عنده ٣٤٠ جنيه الكيلو وعنده نوع اول مره ينزل ب٤٣٥ الكيلو بس كثافته اكتر وضهره انعم ومجبتش منه روحت عند cotton cany علبتكس ده اللي جبت منه نوعين الاسفنجي العادي ضهره مخلوط بس محترم والضهر في وبره كده بتطلع قالي بتروح بعد مرتين غسيل عشان بس تفهمو العملاء وده ب ٣١٠ ولو عاوزه عينه بيديكي حسب اللون المفتوح وييزيد ٢٥٪؜ علي سعر الكيلو وجبت نوع تاني داخل في بوليستر بس عندهم معالج ضد انه يوبر ده عجبني اكتر من الاسفنجي كمان بس هو اخف بس شكله احلي لو هتعملو سوت او بنطلونات وايد ليج ب ٢٣٠ الكيلو اسمها hp وعند جميع انواع الجبردين والحلو فيه الموديلات الجاهزه عنده بتاخدي منها افكار واللي يعجبك ممكن يوزنهولك هتعرفو بياخد كاك كيلو بالتقريب كده وممكن تصورو عادي الموديلات وتنفزوها لو عجباكو وبعدين روحت جبت فرو مستورد للجواكت والفيستات وده موجود في محلات كتيره اللي عالشارع جنب علبتكس الصف ده كله فيه حاجات حلوة والمتر بتاعه من ١٨٥ ل ٥٠٠ حسب نوعه والعرض في لغايه عرض ٢٤٠ سم وبعد كده النور قطع في المنطقه كلها وكان فاضل تلت ساعه ويقفلو فمشيت وهنزل تاني باذن الله هنزلكو كروت المحلات وصور القماش واي سؤال تحت امركو